ସିଟି ଗ୍ୟାସ ବିତରଣ ନୀତି ବିଜ୍ଞପ୍ତି ଜାରି : ସ୍ଥାପନ ହେବ ୨୭୧ CNG ଷ୍ଟେସନ, ୫୧୦୦ କୋଟି ନିବେଶରେ ବ୍ୟାପକ ନିଯୁକ୍ତି ସୁଯୋଗ... ଭୁବନେଶ୍ୱର, ୦୯/୦୫(ନି.ପ୍ର): ପାଇପ ...
ସିଟି ଗ୍ୟାସ ବିତରଣ ନୀତି ବିଜ୍ଞପ୍ତି ଜାରି : ସ୍ଥାପନ ହେବ ୨୭୧ CNG ଷ୍ଟେସନ, ୫୧୦୦ କୋଟି ନିବେଶରେ ବ୍ୟାପକ ନିଯୁକ୍ତି ସୁଯୋଗ...
ଭୁବନେଶ୍ୱର, ୦୯/୦୫(ନି.ପ୍ର): ପାଇପ ଯୋଗେ ରନ୍ଧନ ଗ୍ୟାସ ପହଞ୍ଚିବ ଘରେ । ରାଜ୍ୟର ବିଭିନ୍ନ ସହରରେ ସ୍ଥାପନ ସିଏନଜି ଷ୍ଟେସନ । ଏ ଦିଗରେ ପ୍ରକ୍ରିୟା ଆଗେଇଛନ୍ତି ରାଜ୍ୟ ସରକାର । କ୍ୟାବିନେଟ ଅନୁମୋଦନ ପରେ ରାଜ୍ୟ ନଗର ଉନ୍ନୟନ ବିଭାଗ ଆଣିଛି ସିଟି ଗ୍ୟାସ ବିତରଣ ନୀତି ବିଜ୍ଞପ୍ତି ।
Ad..
ଏହି ପ୍ରକଳ୍ପରେ ପ୍ରାୟ ୫୧୦୦ କୋଟି ଟଙ୍କାର ପୁଞ୍ଜି ନିବେଶ ହେବ । ୯ ଲକ୍ଷ ୯ ହଜାର ୬୮୨ଟି ପରିବାରକୁ ପାଇପ ଯୋଗେ ଘରୋଇ ରନ୍ଧନ ଗ୍ୟାସ (ପିଏନଜି) ସଂଯୋଗ ହେବ । ଏହାସହିତ ୨୭୧ଟି ସିଏନଜି ଷ୍ଟେସନ ସ୍ଥାପନ କରିବାକୁ ସରକାର ଲକ୍ଷ୍ୟ ରଖିଛନ୍ତି ।
Ad..
ଏହି ନୀତିକୁ କାର୍ଯ୍ୟକାରୀ କରିବା ପାଇଁ ନଗର ଉନ୍ନୟନ ବିଭାଗକୁ ନୋଡାଲ୍ ଏଜେନ୍ସି ନିଯୁକ୍ତ କରାଯାଇଛି।ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ରାଜ୍ୟସ୍ତରୀୟ ଶୀର୍ଷ କମିଟି ଓ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଜିଲ୍ଲାସ୍ତରୀୟ ଅନୁଧ୍ୟାନ କମିଟି ଗଠନ ହୋଇଛି ।
Ad..
ଜିଲ୍ଲାସ୍ତର କମିଟିଗୁଡ଼ିକୁ ସିଙ୍ଗଲ୍ ୱିଣ୍ଡୋ ଅନୁମୋଦନ ବ୍ୟବସ୍ଥା ଭାବେ କାର୍ଯ୍ୟ କରିବାର ଅଧିକାର ଦିଆଯାଇଛି । ଫଳରେ ଗ୍ୟାସ୍ ପାଇପ୍ଲାଇନ୍ ବିଛାଇବା ଏବଂ ଭିତ୍ତିଭୂମି ଛିଡ଼ା କରିବା ସମ୍ପର୍କିତ ଅନୁମତି ପ୍ରକ୍ରିୟାକୁ ଅଧିକ ସରଳ ତ୍ୱରିତ ହେବ। ସିଟି ଗ୍ୟାସ ବିତରଣ କ୍ଷେତ୍ରର ଦ୍ରୁତ ସମ୍ପ୍ରସାରଣକୁ ପ୍ରୋତ୍ସାହନ ଦେବାକୁ ସମସ୍ତ ଅନୁମତି ଏବଂ ତଦାରଖ ଶୁଳ୍କ ୨୦୧୭ ମସିହା ମାର୍ଚ୍ଚ ୩୧ ପର୍ଯ୍ୟନ୍ତ ଛାଡ଼ କରାଯାଇଛି।
Ad..
ନୀତିର ବ୍ୟବସ୍ଥା ଅନୁସାରେ ପ୍ରକଳ୍ପ ପାଇଁ ଆବେଦନ ମିଳିବାର ୭ଟି କାର୍ଯ୍ୟଦିବସ ମଧ୍ୟରେ ଅନୁମତି ଦିଆଯିବ । ୩୦ ଦିନ ମଧ୍ୟରେ କୌଣସି ନିଷ୍ପତ୍ତି ନ ହେଲେ ଏହାକୁ ସ୍ୱତଃ ଅନୁମୋଦିତ ଭାବେ ଗ୍ରହଣ କରାଯିବ।
ରାଜ୍ୟରେ ସିଟି ଗ୍ୟାସ ବିରତଣ ଭିତ୍ତିଭୂମି ବିକାଶ ପାଇଁ ଗେଲ୍, ଗେଲ୍ ଗ୍ୟାସ, ବିପିସିଏଲ୍, ଆଦାନୀ ଟୋଟାଲ୍, ମେଘା ଗ୍ୟାସ ଭଳି ୫ଟି ପ୍ରମୁଖ ସଂସ୍ଥା ଦ୍ୱାରା ପ୍ରାୟ ୫୧୦୦ କୋଟି ଟଙ୍କାର ନିବେଶ ସମ୍ଭାବନା ରହିଛି । ଏହା ମାଧ୍ୟମରେ ରାଜ୍ୟରେ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି ହେବ ।
ସହରୀ ଭିତ୍ତିଭୂମି ବିକାଶକୁ ନୂଆ ଗତି ମିଳିବ । ସିଟି ଗେଟ୍ ଷ୍ଟେସନ୍ ଏବଂ ସିଏନଜି ଷ୍ଟେସନ୍ ସ୍ଥାପନ ପାଇଁ ସରକାରୀ ଜମିକୁ ୩୦ ବର୍ଷ ପାଇଁ ଦୀର୍ଘମିଆଦୀ ଲିଜ୍ ଭିତ୍ତିରେ ଅଗ୍ରାଧିକାର ଦେବାର ବ୍ୟବସ୍ଥା ରହିଛି । ୫ ଲକ୍ଷରୁ ଅଧିକ ଜନସଂଖ୍ୟା ବିଶିଷ୍ଟ ସହରରେ ଶିକ୍ଷାନୁଷ୍ଠାନ ଓ ବେସରକାରୀ ବସ୍ଗୁଡ଼ିକୁ ଆଗାମୀ ଦୁଇ ବର୍ଷ ମଧ୍ୟରେ ସିଏନଜି ବ୍ୟବହାର କରିବାକୁ ପଡ଼ିବ ।
ଫଳରେ ସହରରେ ପ୍ରଦୂଷଣ ହ୍ରାସ ସହ ପରିବେଶ ସୁରକ୍ଷିତ ହେବ।ପିଏନଜି ଓ ସିଏନଜି ଅତ୍ୟାବଶ୍ୟକ ସେବା ହୋଇଥିବାରୁ ଜରୁରୀକାଳୀନ ପରିସ୍ଥିତିରେ ମଧ୍ୟ ଏହାର ଯୋଗାଣ ଓ ପରିବହନ ବାଧାପ୍ରାପ୍ତ ହେବ ନାହିଁ। ଆଗକୁ ସମସ୍ତ ସରକାରୀ କ୍ୱାର୍ଟର୍ସ ଓ ଅଫିସ ବିଲ୍ଡିଂରେ ପିଏନଜି ସଂଯୋଗ ରହିବ।
ଆବାସିକ ଓ ବାଣିଜ୍ୟିକ କୋଠାବାଡ଼ି ପ୍ଲାନ ଅନୁମୋଦନ ସମୟରେ ପିଏନଜି ପାଇପ ଲାଇନ ପାଇଁ ସ୍ଥାନ ରଖିବାକୁ ଆଗାମୀଦିନରେ ନିୟମରେ ସଂଶୋଧନ ଅଣାଯିବ। ନୀତିର ବ୍ୟବସ୍ଥା ଅନୁସାରେ ଗ୍ୟାସ ପାଇପଲାଇନ ବିଛାଇବାବେଳେ ‘ଖୋଳନ୍ତୁ ଓ ପୂର୍ବ ସ୍ଥିତିକୁ ଫେରାନ୍ତୁ’ ପଦ୍ଧତି ଆପଣାଯିବ । ପାଇପଲାଇନ ବିଛାଇବାବେଳେ ରାସ୍ତା କିମ୍ବା ଅନ୍ୟାନ୍ୟ ସମ୍ପତ୍ତିର କ୍ଷୟକ୍ଷତି ହେଲେ ସଂପୃକ୍ତ ସଂସ୍ଥା ନିଜ ଖର୍ଚ୍ଚରେ ତାହାର ମରାମତି କରିବେ।
Edited by k.s thakur...
No comments