ବରଗଡ଼ର ଇତିହାସ, ସଂସ୍କୃତି ଓ ପ୍ରତ୍ନତତ୍ତ୍ୱର ଦଲିଲୀକରଣ ପାଇଁ ଜାତୀୟ ଆଲୋଚନାଚକ୍ର...
Ad..
ବରଗଡ଼ର ଇତିହାସ ବିଭାଗ ଓ ଗଙ୍ଗାଧର ମେହେର ବିଶ୍ୱବିଦ୍ୟାଳୟ, ସମ୍ବଲପୁରର ମିଳିତ ସହଯୋଗରେ ଆଜି ଏକଦିବସୀୟ ଜାତୀୟ ଆଲୋଚନାଚକ୍ର ‘ଇତିହାସ, ସଂସ୍କୃତି ଓ ବରଗଡ଼ର ପ୍ରତ୍ନତତ୍ତ୍ୱ’ ଆୟୋଜିତ ହୋଇଥିଲା।
Ad..
ଗଙ୍ଗାଧର ମେହେର ବିଶ୍ୱବିଦ୍ୟାଳୟର କୁଳପତି ପ୍ରଫେସର ବ୍ୟୋମକେଶ ତ୍ରିପାଠୀଙ୍କ ପ୍ରେରଣା ଓ ଦୂରଦୃଷ୍ଟି ଏହି ଅଭିନବ ପଦକ୍ଷେପର ମୁଖ୍ୟ ପ୍ରେରକ ଥିଲା।
ପଶ୍ଚିମ ଓଡ଼ିଶାର ବିଭିନ୍ନ ଅଞ୍ଚଳର ଆଞ୍ଚଳିକ ଇତିହାସ, ଲୋକପରମ୍ପରା, ପ୍ରତ୍ନତାତ୍ତ୍ୱିକ ନିଦର୍ଶନ ଓ ସାଂସ୍କୃତିକ ଐତିହ୍ୟକୁ ସଂଗ୍ରହ କରି ଏକ ସମୃଦ୍ଧ ଐତିହାସିକ ଦଲିଲ ପ୍ରସ୍ତୁତ କରିବା ଏହି ଆଲୋଚନାଚକ୍ରର ପ୍ରମୁଖ ଉଦ୍ଦେଶ୍ୟ। ଏହି ଅଭିଯାନର ପ୍ରଥମ ପର୍ଯ୍ୟାୟ ବରଗଡ଼ରୁ ଆରମ୍ଭ ହୋଇଛି।
କାର୍ଯ୍ୟକ୍ରମରେ ଇତିହାସ ବିଭାଗର ଅଧ୍ୟାପିକା ସୁଶ୍ରୀ ଅଙ୍କିତା ସାହୁ ଅତିଥି ପରିଚୟ ପ୍ରଦାନ କରିଥିବାବେଳେ ମହାବିଦ୍ୟାଳୟର ଅଧ୍ୟକ୍ଷା ଶ୍ରୀମତୀ ନନ୍ଦିନୀ ନିରୋଦ ପଣ୍ଡା ସ୍ୱାଗତ ଭାଷଣ ଦେଇଥିଲେ। ଡ. ସତ୍ୟନାରାୟଣ ନନ୍ଦ ଆଲୋଚନାଚକ୍ରର ବିଷୟବସ୍ତୁ ଓ ଏହାର ଗୁରୁତ୍ୱ ଉପସ୍ଥାପନ କରିଥିଲେ।
ମୁଖ୍ୟ ଅତିଥି ପ୍ରଫେସର ବ୍ୟୋମକେଶ ତ୍ରିପାଠୀ ନିଜ ବକ୍ତବ୍ୟରେ ଗ୍ରାମର ପରିଚୟ ଓ ଆଞ୍ଚଳିକ ଇତିହାସର ଗୁରୁତ୍ୱ ଉପରେ ଆଲୋକପାତ କରିଥିଲେ। ବରଗଡ଼ର ଇତିହାସକୁ ସଂଗ୍ରହ, ଅନୁସନ୍ଧାନ ଓ ଲିପିବଦ୍ଧ କରିବା ପାଇଁ ସେ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରିଥିଲେ।
ସମ୍ମାନିତ ଅତିଥି ବରିଷ୍ଠ ସାମ୍ବାଦିକ ଶ୍ରୀ ଦୀପକ ପଣ୍ଡା ବରଗଡ଼ ଜିଲ୍ଲାର ଐତିହ୍ୟସ୍ଥଳୀଗୁଡ଼ିକର ତାଲିକା ପ୍ରସ୍ତୁତି ଓ ବୀର ସୁରେନ୍ଦ୍ର ସାଏଙ୍କ ଅବଦାନକୁ ଲିପିବଦ୍ଧ କରିବାର ଆବଶ୍ୟକତା ଉପରେ ମତ ରଖିଥିଲେ।
ବୈଷୟିକ ଅଧିବେଶନରେ ଡ. ସାକିର ହୁସେନ ବରଗଡ଼ର ଟେରାକୋଟା ବୃଷଭ ମୂର୍ତ୍ତି ଓ ଲୋକପରମ୍ପରାଭିତ୍ତିକ ପ୍ରତ୍ନତତ୍ତ୍ୱ ସମ୍ପର୍କରେ ଗବେଷଣା ପତ୍ର ଉପସ୍ଥାପନ କରିଥିଲେ। ଡ. ଖିରସିନ୍ଦୁ ବାରିକ ପଶ୍ଚିମ ଓଡ଼ିଶାର ବରଗଡ଼ ଉଚ୍ଚଭୂମି ଅଞ୍ଚଳର ଶିଳାଚିତ୍ର, ଲାଲ ଗେରୁ ଓ କ୍ଷୁଦ୍ର ପ୍ରସ୍ତର ଉପକରଣ ପରମ୍ପରା ଉପରେ ନିଜର ଗବେଷଣା ପତ୍ର ଉପସ୍ଥାପନ କରିଥିଲେ।
ଶ୍ରୀ କୃଷ୍ଣକାନ୍ତ ଲହଙ୍ଗୀର ପଶ୍ଚିମ ଓଡ଼ିଶାର ଆରାଧ୍ୟା ଦେବୀ ଓ ଦିବ୍ୟ ମାତୃଶକ୍ତିର ପରମ୍ପରା ସମ୍ପର୍କରେ ଆଲୋଚନା କରିଥିଲେ। ବରିଷ୍ଠ ସାମ୍ବାଦିକ ଶ୍ରୀ ସୁରେନ୍ଦ୍ର ହୋତା ବରଗଡ଼ର ତନ୍ତ୍ର ପରମ୍ପରା ଉପରେ ଆଲୋକପାତ କରିଥିଲେ।
ସାମ୍ବାଦିକ ଶ୍ରୀ ବୀରେନ୍ଦ୍ର ପ୍ରଧାନ ସ୍ୱାଧୀନତା ପରବର୍ତ୍ତୀ ବରଗଡ଼ର ସାମାଜିକ ଓ ରାଜନୈତିକ ବିକାଶ ତଥା ରାଜନୈତିକ ପରିବର୍ତ୍ତନର ଚିତ୍ର ଉପସ୍ଥାପନ କରିଥିଲେ। ଐତିହାସିକ ଶ୍ରୀଯୁକ୍ତ ଅଶୋକ କୁମାର ବେହେରା ବରଗଡ ଧନୁଯାତ୍ରାର ସାମାଜିକ ଓ ଆର୍ଥିକ ମୂଲ୍ଯବୋଧ ଉପରେ ଆଲୋଚନା କରିଥିଲେ।
ସେହିପରି ଡ. ଭାରତ ଚନ୍ଦ୍ର ସାହୁ ବରଗଡ଼ ଜିଲ୍ଲାର ମାଆ ସମଲେଇଙ୍କ ଉପରେ ଏକ ବିଷୟଭିତ୍ତିକ ଅଧ୍ୟୟନ ଉପସ୍ଥାପନ କରିଥିବାବେଳେ ଡ. ଚୂଡ଼ାମଣି ରଣା ପ୍ରାଚୀନ ମାନବର ଜ୍ଞାନଗତ ବିକାଶର ଉତ୍ପତ୍ତି ଓ ପ୍ରକ୍ରିୟା ସମ୍ପର୍କରେ ନିଜର ଗବେଷଣାମୂଳକ ମତ ରଖିଥିଲେ।
ଏହି ଆଲୋଚନାଚକ୍ର ବରଗଡ଼ର ଅନାଲୋଚିତ ଐତିହାସିକ ତଥ୍ୟ, ପ୍ରତ୍ନତାତ୍ତ୍ୱିକ ନିଦର୍ଶନ, ଦେବଦେବୀଙ୍କ ଉପାସନା ପରମ୍ପରା ଓ ସାମାଜିକ-ରାଜନୈତିକ ଇତିହାସକୁ ଏକତ୍ର କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପ୍ରୟାସ ଭାବେ ବିବେଚିତ ହୋଇଛି।
ଏହା ଭବିଷ୍ୟତରେ ଗବେଷକ, ଛାତ୍ରଛାତ୍ରୀ ଓ ସାଧାରଣ ଲୋକଙ୍କ ପାଇଁ ପଶ୍ଚିମ ଓଡ଼ିଶାର ଐତିହ୍ୟକୁ ଜାଣିବାରେ ସହାୟକ ହେବ ବୋଲି ଆଶା ପ୍ରକାଶ ପାଇଛି।ଶେଷରେ ଇତିହାସ ବିଭାଗର ଅଧ୍ୟାପିକା ଶ୍ରୀମତୀ ଜ୍ୟୋତି ଦାଶ ଧନ୍ୟବାଦ ଅର୍ପଣ କରିଥିଲେ।
Edited by k.s thakur...
